विजयप्राप्ति दसैंको प्रतीकात्मक अर्थ हो । त्रेतायुगमा अयोध्याका राजा रामचन्द्रले अत्याचार र अधर्मका प्रतीक रावणलाई युद्धमा हराएको पौराणिकतासँग यो पर्व जोडिएको छ । यसैका आधारमा समाजशास्त्रीले दसैंलाई शक्ति प्रदर्शनको पर्व भन्दै राजनीतिसँग समेत जोडेर हेर्ने गरेको पाइन्छ । पौराणिक र समाजशास्त्रीय तर्कको आफ्नै महत्त्व छ, यद्यपि हाम्रा सन्दर्भमा दसैं भनेको वर्ष दिनभरिको रिसराग, द्वेष र कलहलाई बिर्सने दिन हो । दसंैले मेलमिलाम, सहमति अनि सहकार्यको सन्देश बोेकेको
हुन्छ तर दुर्भाग्य, हामी असहमति र बेमेलपूर्ण राजनीतिक परिवेशमा यो पर्व मनाउँदै छौं । बाह्रौंपटक प्रधानमन्त्रीका लागि व्यवस्थापिका संसद्मा निर्वाचन भइसक्दा पनि दलीय आग्रह र गणितको राजनीतिबाट बाहिर निस्कन नसकेको हाम्रो राजनीतिक नेतृत्वका लागि दसैंको सन्देश निरर्थक जस्तो भइदिएको छ ।
पटकपटकको अवसरलाई चुकाउँदै आएको नेपालको राजनीतिक नेतृत्वका सामु फेरि एकपटक सहमतिको मार्गप्रशस्त गर्ने अवसर मिलेको छ । आपसी मनमुटाव र द्वेषलाई पछाडि छोड्दै दसैंलाई राजनीतिक मेलमिलापको दिशामा बढ्न अब चुक्नु हुन्न । प्रमुख दलका केही प्रमुख नेता विशेषका आग्रह र व्यक्तिगत प्रतिष्ठाको बन्धक पूरै देश र ऐतिहासिक प्रक्रिया हुनपुगेको छ । राजनीतिमा विकसित यो जटिलताले आम जनतामा घोर निराशाको अवस्था उत्पन्न भएको छ भने मुलुक देशी/विदेशी स्वार्थ शक्ति समूहको खेलमैदानमा परिणत हुने खतरा झनै बढ्दो छ । यद्यपि संक्रमणकालीन अवस्थामा बढ्दो यो जटिलताबाट मुक्त गर्ने दायित्व यिनै राजनीतिक दल र नेताहरूको काँधमा छ । तसर्थ दसैंले राजनीतिक गत्यावरोध अन्त्य र नयाँ आधारमा नयाँ सहमति गर्दै प्रमुख दलका शीर्ष नेताहरूलाई थाती रहेका ऐतिहासिक प्रक्रिया टुङ्गोमा पुर्याउने सद्बुद्धि र सफलता मिलोस् । दसैंको हार्दिक शुभकामना ।
No comments:
Post a Comment